Vedtekter

1. FØREMÅL.
Barnehagar eigde og drivne av Tysnes kommune, skal gje barn under opplæringspliktig alder gode vilkår for utvikling og aktivitet, i nær forståing og samarbeid med heimane.
Barnehagen skal hjelpa til med å gje barna ei oppseding i samsvar med kristne grunnverdiar.

2. BARNEHAGEN SITT INNHALD.
Barnehagen skal vera ei pedagogisk tilrettelagd verksemd, og skal drivast i samsvar med Lov om barnehagar og Rammeplan for barnehagen.
Rammeplanen set opp: - forpliktande mål som barnehagen skal arbeida i retning av
- krav til kvalitet i det sosiale samspelet i kvardagen
- sju fagområde som alle barn skal få erfaring med i løpet av
barnehageåret

Eigar kan tilpassa rammeplanen til lokale tilhøve.

3. FORVALTINGSMYNDE.
a) Barnehagane skal drivast i samsvar med Lov om barnehagar og gjeldande forskrifter, herunder Rammeplan for barnehagar.
b) Tysnes kommune eig og driv barnehagane, og dei er organisatorisk knytt til oppvekstetaten.
c) Politisk høyrer barnehagane inn under mandatområdet til Oppvekst/omsorg.

4. SAMARBEIDSUTVAL.
For å sikra samarbeidet med barna sin heim, skal kvar barnehage ha eit samarbeidsutval med representantar for foreldre/føresette, tilsette og eigar.
Samarbeidsutvalet skal vera eit rådgjevande, kontaktskapande og samordnande organ. Utvalet skal særleg vera med å drøfta barnehagens ideelle grunnlag, og arbeida for å fremja kontakt mellom barnehagen og lokalsamfunnet.
Samarbeidsutvalet skal bli førelagt og har rett til å uttala seg i saker som er viktige for barnehagen sitt innhald, verksemd og tilhøvet til foreldra. Slike saker er bl.a. framlegg til budsjett, drifts-endringar, utnytting av ute- og inneareal m.m.
Samarbeidsutvalet skal påpeika andsynes eigar, og kan melda frå til kommune eller fylkesmann som tilsynsmynde, dersom barnehagen ikkje vert driven innanfor dei rammene som vert sett av gjeldande lover og forskrifter, vedtekter og budsjett.
Ved avstemming har kvar representant ei stemme. Ved stemmelikskap har leiaren dobbeltstemme.
Styrar for barnehagen har møte-, tale- og forslagsrett i samarbeidsutvalet.

5. FORELDRERÅD.
For å sikra samarbeidet med barna sin heim, skal kvar barnehage ha eit foreldreråd, som består av alle foreldre/føresette til barn i barnehagen.

Foreldrerådet skal fremja fellesinteressene til foreldra og bidra til at samarbeidet mellom barnehagen og foreldregruppa skapar eit godt barnehagemiljø.

Foreldrerådet skal få seg førelagt og har rett til å uttala seg i saker som er viktige for foreldra sitt tilhøve til barnehagen. Dersom ei sak ikkje blir lagd fram for foreldrerådet, kan rådet krevja at saka blir lagd fram, dersom saka er viktig for foreldra sitt tilhøve til barnehagen.
Ved avstemming skal det gjevast ei stemme for kvart barn, og vanleg fleirtalsvedtak gjeld.

6. DRIFTSFORM – OPNINGSTID - FERIE
Barnehagane har ei generell opningstid på 5 dagar pr. veke a 9,5 timar, til vanleg frå kl. 7.00 til 16.30.
For einskilde avdelingar kan dette variera noko frå år til år, grunna liten søknad/endring i drifta.
Barnehagane er godkjende for barn frå 0-6 år

Oppstart av nytt barnehageår vert kunngjort i skule/barnehageruta.
Alle barn i barnehagen skal ha 4 vekers ferie i løpet av barnehageåret.
3 av desse vekene skal takast i skulen sin sommarferie. Ein av barnehagane i kommunen vil halda ope heile sommaren dersom talet på påmelde born er minst 8.

Foreldra skal innan 30. april gje melding om kva tid barnet skal ha sommarferie.
Innanfor dagleg opningstid må opphaldstida for det einskilde barnet ikkje overstiga 9 timar pr. dag.

Endringar i driftsform kan skje frå eit barnehageår til eit anna, då føresetnadene for drift ved dei ulike barnehagane kan endrast.

7. BETALING - BETALINGSSATSAR.
a) Stortinget har fastsett ein makspris for full plass i barnehagen. Denne er for tida på kr. 2330,-
b) Betaling skjer ved innbetaling direkte til kommunekassen 1 gong pr. mnd.
Er det ikkje betalt innan forfall, vert det sendt purring. Det vert rekna forseinkingsrente etter gjeldande satsar. Manglar det framleis betaling etter purring, vert det sendt varsel om oppseiing av barnehageplassen. Dersom ein skuldar betaling for meir enn to månader, vil barnehageplassen verta sagd opp, og gjelda går til forliksråd/inkasso.
c) Dersom eit barn er vekke grunna sjukdom samanhangande meir enn 1mnd.,kan foreldrebetalinga verta redusert når sjukdom vert dokumentert ved legeattest.
d) Søskenmoderasjon: Det vert gjeve søskenmoderasjon. Det vil sei at ein betalar full sats for 1.barnet, får 30 % reduksjon for barn nr. 2, og 50 % for barn nr. 3 og øvrige barn.
e) Dersom eit barn skal slutta i barnehagen i løpet av barnehageåret, eller redusera plassen, må det til vanleg meldast frå skriftleg. Oppseiingstida er 2 (to) heile kalendermånader rekna frå den 1. i påfølgjande månad. Etter 1.mai må ein betala ut barnehageåret.
f) Ev. søknad om friplass må fremjast etter Lov om sosiale tenester eller Lov om barnevernetenester før barnet byrjar i barnehagen.

8. OPPTAK - OPPTAKSKRITERIA.
a) Ledige barnehageplassar vert kunngjorde i lokalpressa, på heimesida til kommunen og i barnehagane. Ved søknad om plass skal det nyttast eige skjema påført naudsynlege opplysningar.
Opptak blir føreteke ut frå dei opplysningane som kjem fram på søknadsskjemaet.
Søknad skal sendast skulekontoret.

b) Det vert føreteke eitt hovudopptak i året, gjeldande frå barnehagestart i august. Søknadsfrist er 1. februar. Det vert elles føreteke suppleringsopptak pr. 1. juni, for søknader som evt. kjem inn etter at hovudopptaket er ferdig.
Søknader som kjem inn etter den tid, vert vurdert fortløpande dersom det er ledige plassar.
Det vert elles sett opp venteliste. Barnehageplassen vert tildelt frå det året ein søkjer, og til han vert sagt opp skriftleg.
Svar på søknad om plass i løpet av barnehageåret, skal gjevast seinast tre månader førbarnet skal byrja i barnehagen.

c) Oppvekstsjefen føretek samordna opptak etter innstilling frå styrarane og barnehagerettleiar.
Melding om opptak vert gjeve skriftleg.

d) Klage: Det er høve til å klaga på eit vedtak fatta av oppvekstsjefen. Ev. klage må setjast fram skriftleg innan 14 dagar etter at melding om vedtak er motteke. Utval for Oppvekst/omsorg er klageinstans.

e) Ved opptak bør ein prioritera barn ut frå følgjande retningsliner:

1. Funksjonshemma barn som etter ei samla vurdering vil ha nytte av barnehageopphaldet (jf. Lov om barnehagar § 13.)
2. Barn som det er gjort vedtak om etter lov om barnevernetenester §§ 4-12 og 4-4.
3. Barn av foreldre/føresette som har svangerskaps-/omsorgspermisjon, får ved søknad om permisjon frå barnehageplass førerett til ledig plass for neste barnehageår, og treng ikkje søkja på nytt (dersom barnet blir teke ut av barnehagen).
4. Barn som av sosiale, pedagogiske eller medisinske årsaker bør få plass i barnehage. Føresetnad for slik prioritering må vera at tildelt barnehageplass kan vera til nytte og hjelp, eller som del av behandling, eller der situasjonen i heimen er slik at det er fare for at nemnde problem kan oppstå.
5. Barn av einslege forsytarar der forsytaren treng plass til barnet av økonomiske og/eller sosiale årsaker, er yrkesaktive eller kan dokumentera at ein tek grunnleggjande utdanning.
6. Barn til studentar og skuleelevar som kan dokumentera at ein tek grunnleggjande utdanning.
7. Barn til arbeidstakarar i Tysnes kommune med spesiell kompetanse som trengst i kommunen. Det vert halde av plassar til dette føremålet fram til suppleringsopptaket 1. juli, etter dette vert plassane tildelt andre søkjarar.
8. Barn i familiar der begge foreldra er i arbeid utanfor heimen.
9. Alle andre søkjarar


Ved opptak bør det takast omsyn til samansetjinga av den einskilde barnegruppa m.o.t. fordeling i alder og kjønn, og slik at tal barn med særskilde behov ikkje vert urimeleg stort.
Utfyllande retningsliner for kriteria:
- ved elles like vilkår vert barn som er busett i Tysnes kommune prioritert.
- barn i same familie bør få plass i same barnehage
- barnets alder,- mellom dei yngste føretek ein opptak etter høgaste alder

9. BARNEHAGANE SINE LEIKE- OG OPPHALDSAREAL.
Desse opplysningane kjem fram i godkjenninga for den einskilde barnehage i kommunen, og gjev opplysningar både om ute- og inneareal.

10. INTERNKONTROLL.
Barnehagane i kommunen er pålagt internkontroll, og følgjer kommunen sine retningsliner/rutinar for dette.

11. HELSETILSYN.
Alle barnehagane er godkjende av kommunelege.
Alle barn står under tilsyn av kommunehelsetenesta.
Sjuke barn skal vera heime p.g.a. smittefaren. Dersom barnet har feber, vert det ikkje teke i mot i barnehagen. Styrar, eller den som til ei kvar tid har ansvaret på avdelinga, har rett til å avgjera om barn som er/vert sjuke bør sendast heim.
Dersom barnet vert sjukt eller skada i løpet av barnehagedagen, vert foreldre/føresette kontakta for evt. henting. Dersom det oppstår alvorleg skade ved ulukke e.l., vert lege kontakta umiddelbart, saman med foreldre/føresette.
Før barnet tek til i barnehagen, skal nødvendige opplysningar om barnet si helse leggjast fram.

12. ANSVAR.
a) Alle barn er ulukkesforsikra gjennom eigar si forsikring av barna.
b) Personalet har ansvar for barna den tida barnehagen er open. Levering og henting er foreldra sjølve ansvarlege for.
c) Dersom barnet skal gå til/frå barnehagen åleine, skal det liggje føre skriftleg avtale mellom foreldre/føresette og barnehagen v/styrar om dette.
d) Barnehagen har ikkje ansvar for eigne leiker etc. som barnet har med seg i barnehagen.
e) Dei tilsette i barnehagen kan ikkje ta med seg barna som passasjerar i eigen bil eller på off. transportmiddel utan foreldra sitt samtykke. Slikt ev. samtykke skal liggje føre skriftleg innan 14 dagar etter at barnet har begynt i barnehagen (på eige skjema).

13. ENDRING AV VEDTEKTENE.
Mindre endringar av vedtektene kan gjerast utan politisk handsaming, då endringar i driftstilhøve o.l. vil kunne skje i løpet av året/for kvart barnehageår.
Andre endringar av vedtektene skal godkjennast av Oppvekst/omsorg.
Vedtektsendringar som har innverknad på foreldre sitt tilhøve til barnehagen, skal leggjast fram for foreldreråd/samarbeidsutval før endeleg handsaming.